Ці здольныя супрацьстаяць абсурду?

Я сам вялікі прыхільнік беларускай мовы і Беларушчыны, і мне даволі прыкра, але ж моц чалавека, па-першае, ў тым, каб прызнаваць відавочнае. Потым можна рабіць высновы і пэўныя захады дзеля выпраўленьня сытуацыі, калі з гэтай сытуацыяй нешта ня так.

Сёньня “фішка” Байнэту – відэаапытанка “Нашай Нівы” “Чаму беларусы перасталі размаўляць па-руску?”.

Ня ведаю, як хто, але тое, што ўбачыў асабіста я, мяне вельмі ўразіла. Ўразіла, між іншым, вельмі негатыўна.

Праблема, і гэтая праблема відавочная, сёньня палягае ў тым, што дагэтуль большасьць беларусаў размаўляюць па-расейскую Пераважная й заўважная большасьць. І невядома, ці ёсьць ўвогуле нейкая пазітыўная дынаміка беларусізацыі. Нават калі ёсьць, яе не заўважна.

Што мы бачым ў сюжэце “Нашай Нівы”? Да рускамоўных людзей падыходзяць іншыя людзі, якія з упэўненым выглядам задаюць пытаньне, якое на 100% не адпавядае рэчаіснасьці. І як паводзяць сябе беларусы?

Яны… яны пагаджаюцца. І пачынаюць шукаць тлумачэньні, каб неяк адказаць на апрыёры абсурднае пытаньне. Абсурднае, бо яно не адпавядае рэчаіснасьці.

Гэтая апытанка – яскрыва прыклад як можна маніпуляваць слабавольнымі людзьмі. А, між іншым, слабавольных, ня толькі ў Беларусі, але па ўсім сьвеце – пераважная большасьць. Спытайся ў яго: “Чаму Лукашэнка набраў на выбарах 99%?” – і ён будзе адказваць, і тлумачыць, нават калі сам не галасаваў, і ЎСЕ ягоныя сябры не галасавалі.

Пастаўце пытаньне як аксыёму і задайце яго з упэўненым выглядам, і вы атрымаеце ад слабога чалавека поўную згоду і колькі заўгодна “пераканаўчых” тлумачэньняў, нават калі прадметам размовы будзе 100-адсоткавы абсурд.

Ці не менавіта так робіць Лукашэнка?

Гэтая апытанка паказала, што патэнцыялу супрацьстаяць абсурду ў сёньняшнім грамадстве мінімум. А вось патэнцыялу прыстасоўвацца да абсурду – колькі заўгодна…